Habang ika'y naglalakbay sa mundong ito,
Maraming bagay ang aakit sayong paningin
Maganda at tama sa persepsyon ng mundo
Ngunit mali pala kung ito ay susuriin.

Ngunit dahil sa tigas ng iyong ulo,
Naging mapusok ka sa pagdedesisyon mo
Para lamang mapunan ang iyong kuryosidad
Iniba mo ang landas ng iyong paglakad.

Nagpakasaya, nagliwaliw, at nagpakarumi
Nasira ang iyong buhay, maging ang sarili
Nilamon ng sistema ng kamunduhan
Nawalay sa daang dapat na lakaran.

Nilamon ka na ng depresyon 
At tinangay ka ng mga alon
Ang iyong isipan ay napuno ng lason
Nakitakbo ka sa mapusok na henerasyon. 

Ang saya sa una ng mga bagay na ito
Mga bagay na sumisira sa sarili mo
At hindi mo ito basta-basta namamalayan
Papatayin ka na pala unti unti nang lubusan. 

Ngayon napaisip ka na lang bigla,
"Ano bang nangyari sa akin" - iyong wika. 
Nagtaka ka at tila ba'y nagsawa
Sa mga bagay na napansin mong paulit-ulit mong ginagawa. 

Unti-unti kang nawalan ng pag-asa
Nasira rin maging ang relasyon sa pamilya
Ngunit isang umaga, nagising ka
Nagising ka at namulat ang iyong mga mata. 

Naramdaman mong may kulang sayong sarili
At pilit mo itong hinanap nang mabuti
Ang pakiramdam ng pagiging kumpleto 
Natagpuan mong muli sa piling ni Cristo. 

At sa iyong muling pagbabalik 
Ika'y nagpakumbaba't nagpasaliksik
Inamin ang iyong mga kamalian
Mga maling desisyon at kabuktutan. 

Muli mong naramdaman ang saya
Ang tunay na saya sa piling Niya
Muli kang nabuo mula sa pagkabasag noon
At  nagpatama sa mga maling bagay na bakas ng kahapon.

May mga pagkakataong tayo'y nadarapa
Madalas nawawalan ng pananampalataya
Ngunit ang mahalaga'y bumabangon tayo
Basa't kasama si Cristo, tuloy ang iyong kwento.